Кожнае лета час ад часу падыходзіць які-небудзь блізкі альбо не вельмі сваяк/знаёмы і па-змоўніцку пытае: «Вам часам кабачкі не патрэбныя? Так шмат вырасла, і такія добрыя… Можа, возьмеце парачку?»

Такім чынам, ратуем кабачкі!🦸

• кабачкі – 2-3 невялікіх
• морква – як палова кабачкоў альбо крыху менш
• цыбуля рэпкавая – як палова кабачкоў альбо крыху менш
• часнок – 2-3 зубцы на сярэдні кабачок
• тамат-паста – 0, 5 – 1 ст. л. на сярэдні кабачок
• цукар
• алей раслінны
• воцат
• соль, перац

---

Кабачкі ачысціць ад скуркі (калі вельмі старыя – то і ад насення), падрыхтаваць астатнюю гародніну:

Моркву і кабачкі парэзаць на дробныя кубікі (можна проста блендэрам, на сярэдняй хуткасці).
Цыбулю дробна насекчы (таксама можна блендэрам, на невялікай хуткасці).
Для часнаку выкарыстоўваць прэс:

Цыбулю, моркву і палову часнаку абсмажыць на раслінным алеі:

Пакласці тамат-пасту і яшчэ злёгку абсмажыць:

Дадаць здробненыя кабачкі і пасаліць:

Тушыць, час ад часу памешваючы, амаль да гатовасці – хвілін 40.

Калі трэба, бліжэй да канца дадаць вады, кансістэнцыя павінна быць такая… Ну як у кабачковай ікры.😉

Пакласці рэшту часнаку: чым больш часнаку на гэтай стадыі, тым больш часночная ікра атрымаецца.

Заправіць, увесь час спрабуючы на смак, перцам, воцатам і цукрам – у кожнага сваё меркаванне пра тое, якой павінна быць кабачковая ікра. Праверыць на соль, давесці да кіпення і выключыць:

Астудзіць.
Можна дадаць любую мясцовую зеляніну:

Калі патрэбна пюрэпадобная кансістэнцыя – пюрыраваць паглыбным блендэрам.

---

Для ўзбагачэння смаку дапушчальна падчас абсмажвання дадаць дробна насечаны салодкі перац.

---

☝️Дарэчы, кабачкі – гэта гатунак гарбуза, ну а цукіні – гэта проста гатунак кабачкоў, які вывелі італьянскія селекцыянеры.