Хумус (па-арабску حُمُّص, на іўрыце חומוס) – традыцыйная закуска левантыйскай кухні, якая ўключае ў сябе кухні Ярданіі, Лівана, Ізраіля, Ірака, Палестыны, Сірыі і паўднёвай Турцыі.

Слова «хумус» паходзіць ад арабскага «حُمُّص»‎, на лацініцы – «hummus», што і азначае «нут». Ну а паста тахіні (тахіна ці тхіна ў розных мовах) – гэта другі асноўны складнік хумусу, таму поўная яго назва на арабскай – «Хумус бі тахіні».

Самую першую згадку рэцэпта хумусу знайшлі ў Каірскіх кулінарных кнігах трынаццатага стагоддзя...

• нут – 1 шклянка 
• тахіні – 1/3 шклянкі 
• цытрынавы сок – 1/4 шклянкі (рэгулюецца паводле жадання)
• часнок – 3-4 зубчыкі (таксама колькасць па жаданні)
• аліўкавы алей – 3-5 сталовых лыжак 
• соль, перац, спецыі (іх спіс ніжэй)

---

Нут пакінуць на ноч у халоднай вадзе:

Зварыць да мяккасці без солі (соль не дае бабовым разварыцца).
Напрыканцы пасаліць і паварыць яшчэ крыху.
Адвар пераліць у якую-небудзь пасудзіну і пакінуць – ён спатрэбіцца для давядзення хумусу да патрэбнай кансістэнцыі.

💡Калі патрэбен аднародны, як смятана, узорны прадукт, варта ачысціць вараны нут ад шалупіння, злёгку пераціраючы яго паміж далоняў. Але можна і не ачышчаць, і тады хумус проста выйдзе больш грубы.

Я заўсёды выкарыстоўваю гатовую пасту тахіні (яна злева на фота ніжэй). Але калі пад рукой будзе толькі кунжут, пасту можна прыгатаваць і самому, перацершы абсмажаны ачышчаны кунжут з дадаткам кунжутнага/аліўкавага алею. Цяпер усе інгрэдыенты ў зборы:

Тахіні і нут здрабніць (у ступцы ці блендэрам – як заўгодна), разводзячы адварам (ці вадой, калі бракуе адвару) да пажаданай кансістэнцыі:

Соль, перац, часнок і цытрынавы сок дадаваць паступова, пры гэтым перамешваць і пастаянна каштаваць:

Базавы хумус гатовы.
Падаваць, спырснуўшы аліўкавым алеем:

Ядуць хумус як закуску (чэрпаюць лавашом) альбо як дадатак да фалафелю, курыцы, рыбы, баклажанаў і г.д.

---

Гэта базавы рэцэпт. А ёсць маса розных рэгіянальных і аўтарскіх варыянтаў.
Вось магчымыя дадаткі да хумусу:

• смажаная цыбуля 
• смажаныя/вяленыя памідоры 
• салодкі перац 
• агуркі 
• марынаваныя агуркі
• кедравыя арэшкі 
• смажаныя грыбы  
• анчоўсы/рыба 
• каперсы 
• арэхі 
• яйкі 
• аліўкі 
• пюрэ з гарбуза 
• сыр фета, 
• какао 
• шпінат 
• кінза 
• …

І класічныя спецыі (ў парадку іх «класічнасці») :

• зіра/кумін 
• кардамон 
• аніс 
• сумах 
• фенхель 
• каляндра  
• папрыка салодкая/вострая 

Можна дадаваць :

• пятрушка 
• кмен 
• мята 
• …

💡Спецыі тыпу зіры ці фенхеля варта папярэдне раздрабніць у ступцы.

Некалькі прыкладаў:

Хумус з вяленымі памідорамі і сушанай цыбуляй:

Вяленыя памідоры дробна нарэзаць:

Дадаць у хумус, змяшаць са спецыямі і сушанай цыбуляй:

Хумус з салодкім перцам:

Салодкі перац дробна нарэзаць:

Дадаць у хумус, змяшаць са спецыямі:

Ну і так далей да бясконцасці…😉