Слова «vinaigrette» – гэта памяншальная форма французскага слова «vinaigre», альбо «воцат». Прасцей кажучы, у перакладзе – нешта тыпу «воцацік».🥹

Гісторыкі сцвярджаюць, што соус з сумесі воцату і расліннага алею ведалі яшчэ ў старажытным Егіпце.
Тым не менш, найбольшы распаўсюд гэты соус атрымаў у XIX стагоддзі – тады яго называлі проста «французская заправа».

У класічнай французскай кухні соус вінегрэт выкарыстоўваецца як заправа для салатаў альбо як соус для падкрэслівання смаку гародніны: напрыклад, цыбулі-парэю альбо артышоку: нарэзаў, спырснуў – і ўжо значна смачней.

• вінны воцат – адна частка з чатырох (1/4) 
• аліўкавы алей – тры часткі з чатырох (3/4) 
• соль, перац 

---

Гэта класічныя французскія прапорцыі – «адзін да трох». Хаця некаторыя французскія кухары, калі трэба падкрэсліць кіслінку, змешваюць і «адзін да аднаго». Ну а чым бліжэй да Міжземнага мора, тым больш прапорцыя ссоўваецца ў бок аліўкавага алею – аж да «адзін да пяці-шасці».

---

Соль і перац распусціць у вінным воцаце:

Затым павольна, па кроплі, увесь час узбіваючы венчыкам альбо блендэрам, уліць раслінны алей і ўзбіваць да атрымання эмульсіі.

У выніку маем базавы соус вінегрэт:

---

У базавы соус, у залежнасці ад пажаданага выніку, дадаюць (спіс у парадку папулярнасці):

• гарчыцу
• цукар альбо кляновы сіроп
• соус ворчэстар
• чабор, размарын, арэгана, мяту і іншыя травы
• дробна насечаную зеляніну (зялёная цыбуля, пятрушка, эстрагон, кроп і г. д.) 
• дробна насечаную цыбулю (лепш шалот) 
• часнок
• звараны ўкрутую яечны жаўток 
• кіслая садавіна (яблык, апельсін альбо лімон)
• каперсы 
• арэхі
• мёд
• і г. д.

Часам воцат замяняюць на цытрынавы альбо лаймавы сок.

Ёсць яшчэ варыянт «бальзамічны вінегрэт» – на основе бальзамічнага воцату.

☝️Можна камбінаваць розныя віды алею і воцату, каб атрымаць розныя прысмакі: напрыклад, цыбульны воцат і гарбузовы алей. Таксама выдатна пойдуць сюды араматызаваныя, настоеныя на травах алеі і воцаты.

Асноўная прымяненне – салаты, гародніна і рыбныя стравы. Часам выкарыстоўваюць як марынад.

---

Падобныя соусы вядомыя ва ўсім свеце – яны адрозніваюцца відамі алею і воцату, а таксама дадаткамі.

Гэтак, у Кітаі і Японіі выкарыстоўваюць кунжутны алей і рысавы воцат.

У Паўднёва-Усходняй Азіі – алей рысавага вотруб’я і белы рысавы воцат з сокам лайму. Дадаюць арэхі і чылі перац.

У ЗША ў вінегрэт могуць дадаць розную садавіну і нават сыр – пармезан ці з блакітнай цвіллю.

Ну а ў Бразіліі ёсць соус «вінагрэтэ» – яго робяць з аліўкавага алею і воцату, а потым навальваюць кучу дробна насечанай цыбулі і памідораў, а часам яшчэ і балгарскага перцу. Атрымліваецца падобна да мексіканскага «піка-дэ-гая».