Яшчэ адзін рэцэпт у стылі «ўчора было свята» (калі, як заўсёды, ежы прыгатавалі зашмат).
Карацей, калі трэба выратаваць учорашнюю смажаніну з бульбай, на дапамогу спяшаецца… Та-дам! Цірольскі Гростль!

Але трэба аддаць яму належнае – прыгатаваны без нагоды, ён ані не горшы (а мо, і лепшы) за гростль з учорашніх прадуктаў.

• бульба – 5 шт. (крыху менш за кілаграм)
• мяса – 0,5 кг (гэта можа быць любое мяса, бекон і нават сасіскі ці кілбаса), плюс можна змешваць розныя гатункі
• цыбуля рэпкавая – 2 сярэдніх ці 1 вялікая
• часнок – 3-4 зубчыкі (па жаданні)
• топленае масла
• зялёная цыбуля
• соль, перац, спецыі (кмен, маяран)
• яйкі – 4 шт.

Ніжэй – варыянт з ялавічынай і беконам.

---

Бульбу адварыць у мундзіры амаль да гатовасці, даць астыць. Гэта як бы сімуляцыя халоднай учорашняй бульбы.😉

Калі гатуеце гростль з мясам – мяса зварыць у падсоленай вадзе да гатовасці:

Бульбу нарэзаць на невялікія тонкія дзелькі ці колцы. 
Мяса нарэзаць на палоскі ці парваць на валокны. 
Калі выкарыстоўваеце кілбасу ці бекон – парэзаць на невялікія кавалкі ці палоскі.
Рэпкавую і зялёную цыбулю дробна насекчы:

На патэльні распусціць масла і абсмажыць рэпкавую цыбулю да празрыстага.
У большасці аўстрыйскіх рэцэптаў часнок не выскрыстоўваюць, але часам здараецца. Усё залежыць ад любові да часнаку:

Калі выкарыстоўваеце бекон, дадаць яго на патэльню:

Абсмажваць цыбулю з беконам да залацістага. Калі бекону няма – абсмажваць да залацістага толькі цыбулю:

Затым пакласці вараную бульбу і смажыць да з’яўлення залацістай скарынкі:

Усыпаць соль, перац і спецыі:

Дадаць мяса і давесці да гатовасці:

Пасыпаць дробна насечанай зялёнай цыбуляй і добра перамяшаць:

На асобнай патэльні засмажыць яечню з 4-х яек.

Падаваць гарачым з яечняй, пасыпаўшы жаўток перцам и соллю:

Guten Appetit!

---

☝️Часам разам з мясам дадаюць памідоры ці грыбы. Гэта, безумоўна, смачна, але ўжо не аўтэнтыка…