Папулярны лёгкі балгарскі суп, па-балгарску «Спаначена супа с ориз».
У базавым варыянце з гародніны тут, акрамя шпінату – толькі цыбуля і морква.
Але ў сваіх рэцэптах балгары часта дадаюць часнок, хвосцікавую салеру ці памідоры, ну ці ўсё адразу.

Ніжэй – класічны варыянт без усялякіх дадаткаў.

• шпінат – 350 г
• цыбуля рэпкавая – 1 вялікая альбо 2 сярэдніх
• морква – 1 вялікая 
• мука – 1 ст. л. без горкі
• рыс – траціна шклянкі (крухмалісты, не басмаці) 
• яйка – 2  шт.
• ёгурт – 150 г 
• масла сметанковае ці раслінны алей
• зеляніна (пятрушка) – паўпучка 
• папрыка – ст. л. без горкі
• соль, перац, спецыі (чабер) 

---

Цыбулю дробна нашаткаваць.
Шпінат нашаткаваць на буйныя кавалкі (сустракаюцца і рэцэпты, у якіх закладваюць лісце цалкам). У скрайнім выпадку дапушчальна выкарыстоўваць замарожаны шпінат.
Моркву нарэзаць на невялікія кубікі:

Цыбулю пасераваць на сметанковым масле альбо раслінным алеі да празрыстага:

Пакласці моркву і абсмажыць да размякчэння:

Калі выкарыстоўваюцца памідоры, ці салера, ці часнок – памідоры нарэзаць на невялікія кубікі, а часнок і салеру – на пласцінкі. Дадаць іх да засмажкі і яшчэ крыху абсмажыць.

Усыпаць муку, заправіць папрыкай і чаберам:

Крыху абсмажыць:

Уліць трошкі вады і старанна перамяшаць, каб не ўтвараліся камякі:

Пакласці шпінат:

Уліць яшчэ крыху вады і злёгку пратушыць да размякчэння шпінату:

Спалучыць з 1,5 – 1,8 літра гародніннага булёну ці вады (колькасць залежыць ад пажаданай гушчыні):

Дадаць рыс, пасаліць і папярчыць:

Варыць да гатовасці рысу.

Прыгатаваць заправу:

Яйкі ўзбіць з ёгуртам:

Дадаць крыху вадкасці з супу, каб зраўняць тэмпературу, узбіць:

Зняць чорбу з агню, даць крыху астыць і дадаць заправу, увесь час памешваючы.
Больш кіпяціць чорбу нельга, інакш згорнецца яечная заправа.
Падаваць, пасыпаўшы дробна насечанай зелянінай:

---

Часам пасыпаюць нацёртай брынзай.😋