Тут усё проста: «Silgu» – салака, «Kaste» – соус.

Выдатна спалучаецца са смажанай ці варанай бульбай, а таксама проста з чорным жытнім хлебам.

• салака свежая ці салёная – 300 г (лепш за ўсё слабасалёная)
• цыбуля рэпкавая – 1 сярэдняя цыбуліна
• масла сметанковае – 40 г
• малако ці булён – 200 г
• мука – 1 ст. л.
• смятана – 150 г
• кроп – пучок

---

Моцнасалёную рыбу можна папярэдне вымачыць у малацэ (ці ў сумесі малака з вадой) каля гадзіны.

Салаку ачысціць ад костак, парэзаць на кавалкі.

Цыбулю нашаткаваць як мага драбней, калі далей збіраецеся праціраць соус праз сіта. Ну а калі плануеце пюраваць блендэрам, можна і большыя кавалачкі пакінуць.

Кроп дробна насекчы:

Традыцыйна ў Эстоніі абсмажваюць на свіным тлушчы ці сметанковым масле (з раслінным алеем раней на Поўначы былі пэўныя праблемы❄️):

Рыбу абсмажыць у сметанковым масле разам з цыбуляй:

Дадаць муку:

Смажыць пару хвілін, увесь час памешваючы.

Тым часам падагрэць малако ці булён градусаў да 70-і.

Уліць у цыбулю гарачае малако ці булён:

Давесці да кіпення, кіпяціць каля 5 хвілін:

Ахаладзіць і працерці праз сіта (ну ці пюраваць блендэрам) :

Дадаць смятану:

Старанна перамяшаць.
Можна дадаткова давесці блендэрам да амаль аднароднай кансістэнцыі:

Дадаць дробна насечаны кроп і, калі трэба, соль.

☝️У соус са свежай салакі солі трэба даволі шмат – смак павінен быць яркі. Ну а калі салака салёная, трэба ўвесь час каштаваць: калі перабраць, давядзецца кампенсаваць соль смятанай:

Добра перамяшаць:

---

Гэты соус традыцыйна падаюць да смажанай ці варанай бульбы.

Ніякіх дадатковых запраў не трэба.

Са свежай салакі робяць радзей: салёная салака традыцыйна была асноўнай ежай.

У скрайнім выпадку можна ўзяць сялёдку, смак падобны. Але гэта ўжо не аўтэнтычна…