Руй (Rouille) – праванскі густы часночны соус для рыбных страў.

Незаменны складнік супу Буябес (Bouillabaisse).

Назва ў перакладзе з французскай азначае «іржа» – дзякуючы колеру, які надаюць яму каенскі перац, папрыка і шафран.

• яечныя жаўткі – 3 шт.
• шафран – 1 дробка
• перац каенскі – 1 дробка
• папрыка – 2 дробкі
• часнок – 3-5 зубцоў
• соль марская буйная – 2 дробкі
• аліўкавы алей – каля 100 мл

---

Часнок прапусціць праз прэс для часнаку:

Аддзяліць жаўткі ад бялкоў:

Злучыць часнок з соллю і спецыямі ў ступцы:

Расцерці ў ступцы душаны часнок, соль, каенскі перац, папрыку і шафран да аднароднай масы.

Дадаць жаўткі, старанна перамяшаць.

Паволі дадаваць алей (кожныя 10 секунд па чайнай лыжцы альбо нават менш), пастаянна памешваючы:

Соус паступова павінен святлець, а па кансістэнцыі нагадваць маянэз:

☝️Вельмі важна не проста пераліць алей, а дадаваць яго паступова, інакш соус можа пачаць пластавацца.

---

Варыянт для лянівых – маянэз, змяшаны з шафранам, чырвоным перцам і тоўчаным часнаком. Але смак ужо не той…

Калі неабходна падкрэсліць нейкі прысмак, да соусу дадаюць (на самым пачатку, з часнаком і спецыямі):

• чорны молаты перац
• дыжонскую гарчыцу
• лімонны сок
• базілік
• цэдру апельсіна 
• печаны салодкі перац 
• і г. д.

Яркі колер іржы дае толькі сапраўдны шафран. Куркума ці імерэтынскі шафран не падыходзяць.

Для стварэння больш аднароднай пастападобнай кансістэнцыі часам у соус дадаюць дробныя паніравальныя сухары ці бульбяное пюрэ.