Калі казаць простымі словамі, папрыкаш (Paprikás) — гэта мясное ці нават рыбнае рагу на смятанным соусе, запраўленае папрыкай.

Нягледзячы на тое, што мяса з папрыкай у Венгрыі гатавалі здаўна, вынаходнікам сучаснага папрыкашу лічыцца французскі кухар Ёжэф Маршаль старэйшы (1832-1914), які вырабляў усялякае смакоцце для імператара Францыі Напалеона III, эрцгерцага Аустрыйскага Альберта і караля Венгрыі Франца Юзафа I.
Як вядома, Венгерская нацыянальная кухня можа быць даволі вострай, і мэтр Маршаль прыдумаў змякчаць яе смятанай на нямецкі капыл.

З цягам часу папрыкаш распаўсюдзіўся па ўсёй Венгрыі, у больш багатых сем’ях страву гатавалі з ялавічыны ці бараніны, ну а паспаліты люд рабіў яго з курыцы.

Цяпер жа папрыкаш традыцыйна гатуюць з белага мяса — птушкі, цяляціны, ягняціны, а таксама з рыбы (толькі прэснаводнай, часцей за ўсё рэкамендуюць сама) і нават з грыбоў.

Пра розныя гатункі папрыкашу напішу ў канцы, ну а цяпер робім просты народны курыны папрыкаш — папрыкаш чырке (Paprikás csirke).

• курыца — 1 шт.
• свіны альбо гусіны тлучш — 1, 5 ст. л.
• папрыка — 2-3 ст. л.
• цыбуля рэпкавая — 2 вялікія альбо 3 сярэднія
• памідор — 1 шт.
• перац – 1 шт.
• смятана – 170 г
• мука – 1 ст. л. без горкі
• соль, перац

---

Курыцу разрэзаць на кавалкі:

Цыбулю дробна нарэзаць.
Перац і памідоры нарэзаць на невялікія кубікі:

Традыцыйна папрыкаш гатуюць на свіным тлушчы, але дапушчальна выкарыстоўваць топленае масла:

Абсмажваць цыбулю да празрыстасці:

Зняць з агню, даць крыху астыць.
Засыпаць папрыку:

Старанна перамяшаць:

Дадаць перац і памідоры:

Перамяшаць:

Пакласці курыцу, пасаліць і папярчыць:

Заліць шклянкай вады і перамяшаць — вадкасць павінна амаль пакрываць курыцу:

Накрыць накрыўкай і тушыць, памешваючы, на слабым агні, пакуль мяса не стане мяккім.
Пры неабходнасці падліваць вады, але не забывацца, што соус не павінен быць занадта вадкі, інакш мяса пазбавіцца смаку.

Па гатовасці акуратна дастаць кавалкі мяса і адкласці:

Надышоў час ўвесці другі па важнасці пасля папрыкі кампанент папрыкашу — смятану:

Усыпаць у смятану муку:

Старанна перамяшаць, каб не было камякоў:

Дадаць пару лыжак соусу, у якім тушылася мяса, перамяшаць:

Спалучыць смятану з соусам:

Перамяшаць, вярнуць у соус мяса:

Добра перамяшаць, накрыць накрыўкай і давесці да кіпення.
Выключыць агонь і даць злёгку настаяцца.
Jó étvágyat!😊

---

Папрыкаш з ялавічыны, цяляціны альбо бараніны гатуецца амаль гэтаксама. Адзінае адрозненне — перац і памідор дадаюць бліжэй да канца тушэння мяса, каб яны не растушыліся ў кашу. Хаця — тут каму як падабаецца…

У некаторых рэцэптах бараніну альбо цяляціну папярэдне абсмажваюць, але ў традыцыйных прадпісаннях гэтага няма.

У Венгрыі звычайна ядуць з клёцкамі, але класна і проста з макаронамі:

Гатункі папрыкашу

Папрыкаш з ялавічынай — мархапарыкаш (Marhapaprikás): лічыцца святочнай стравай.

Папрыкаш з цяляцінай — бор’юпапрыкаш (Borjúpaprikás): у Венгрыі лічаць, што цяляціна цудоўна пасуе да папрыкашу, але не вельмі падыходзіць для гуляшу і пёркёльту.

Папрыкаш з баранінай — біркапапрыкаш (Birkapaprikás) — традыцыйная святочная страва рэгіёну Надзькуншаг. Да стравы падыходзяць вельмі адказна: у адным кацялку нават ніколі не змешваюць мяса ад розных авечак. Дэвіз — „Egy birka egy bogrács” («Адна авечка — адзін збан»).🐑

Папрыкаш з курыцай — папрыкаш чырке (Paprikás csirke) — самы распаўдюджаны гатунак папрыкашу. Лічыцца, што смятана найлепш грае менавіта з курыным мясам.

Папрыкаш з рыбай — халпапрыкаш (Halpaprikás) — традыцыйна гатуецца з сомам. Дарэчы, першапачаткова халпапрыкаш быў народнай назвай рыбнага супу, а дзе-нідзе яна выкарыстоўваецца і дагэтуль. Але ўсё ж халпапрыкаш — гэта не суп, а рыбнае рагу.