Norsk fiskesuppe першапачаткова быў простым традыцыйным супам на базе найбольш распаўсюджаных у Скандынавіі лакальных прадуктаў: булёну з рыбных костак, тлустага малака і сметанковага масла, плюс рыба. Звычайна гэта была траска, якая ў Скандынавіі лічылася самай таннай і даступнай.

Пазней у суп сталі закладваць гародніну, каб злёгку разбавіць яркі рыбны смак. А яшчэ пазней пачалі дадаваць морапрадукты (мідыі ці крэветкі) і больш дарагія гатункі рыбы (напрыклад, фарэль ці сёмгу).

Ніжэй – сучасны варыянт: са свежай гароднінай, траской, сёмгай і мідыямі, бланшаванымі ў белым віне. Белае вінаграднае віно ў Нарвегіі заўсёды было прывазное, а таму нятаннае.

Булён:

• рыбныя косткі/галовы/дробная рыба — 0,5 кг 
• цыбуля рэпкавая — 1 сярэдняя 
• морква — 2 сярэдніх 
• цыбуля-парэй — адрэзак каля 10 см 
• салера — палова ад колькасці морквы 
• фенхель — палова, альбо насенне фенхеля — 0,5 ч. л. 
• белае віно — 200 мл (па жаданні) 
• перац чорны, духмяны, лаўровы ліст

Суп:

• рыбны булён — 1 л
• філе рыбы (пажадана белая плюс чырвоная) — 600 г (класіка – траска)
• крэветкі ці мідыі — па жаданні
• белае сухое віно — 150 мл (па жаданні)
• цыбуля-шалот — 2 сярэдніх
• морква — 2 сярэдніх
• агурок — 1 сярэдні 
• салера чаранковая — 2 сцябліны
• шніт-цыбуля — 1 невялікі пучок (можна браць звычайную зялёную цыбулю)
• малако — 200 мл
• вяршкі 20 % — 300 мл
• сметанковае масла — 2 ст. л. 
• лімон — на смак, да пажаданай кіслінкі
• соль, перац

---

Прыгатаваць булён з гароднінай са спісу і белым віном (апошняе па жаданні).
Гародніну можна папярэдне абсмажыць у раслінным алеі, для яркасці смаку:

Шалот дробна нарэзаць:

Абсмажыць цыбулю-шалот на сметанковым масле (1 ст. л.) да залацістага:

Усыпаць муку, размяшаць, злёгку абсмажыць.
Развесці цёплым рыбным булёнам:

Дадаць малако і вяршкі і давесці да кіпення.
Варыць без накрыўкі каля 5 хвілін, да загусцення:

Спалучыць з булёнам.

Мідыі абліць кіпенем, стананна прамыць, заліць віном, закіпяціць і варыць пару хвілін (калі закрытыя – аж пакуль не раскрыюцца):

Зліць адвар і адправіць яго ў рондаль да булёну.

Булён закіпяціць, пакласці сметанковае масла.
Заправіць соллю, перцам і лімонным сокам.

Рыбу нарэзаць на кубікі сярэдняга памеру:

Нашаткаваць тонкай саломкай моркву, салеру, агурок, дробна нарэзаць зялёную цыбулю:

Апусціць рыбу ў рондаль (☝️акуратна, і потым актыўна не перамешваць, каб не развалілася).

Давесці да кіпення і праз 3-5 хвілін агонь выключыць.

У талерку пакласці мідыі і рыбу, заліць булёнам і пасыпаць гароднінай:

Дадаткова да супу звычайна нічога не падаюць, бо ён і так досыць сытны.

---

На захадзе Нарвегіі дадаюць бульбу – вараць да гатовасці ў булёне, а далей усё паводле рэцэпту.

☝️Вельмі важна не пераварыць рыбу – яна павінна застацца сакавітай.

Склад гародніны можна мяняць. Яе можна таксама наразаць на буйнейшыя кавалкі і дадаваць проста ў рондаль (маючы на ўвазе, што пры гэтым згубіцца свежы смак).

Сустракаюцца рэцэпты і з сушанай рыбы (нарвежскай, натуральна), папярэдне размочанай у малацэ на працягу пары гадзін.

Гэткае спалучэнне малака і рыбы сустракаецца і ў Фінляндыі (суп Калакейта/Лахікейта), і ў Шатландыi (Кален-скінк), і ў іншых краінах Балтыйскага рэгіёну.