Начас — гэта закуска мексіканскага паходжання, якая складаецца з абсмажаных кавалачкаў кукурузнай аладкі (тарцільі), пакрытай соусам (найчасцей сырным) альбо іншым начыннем.

Паводле легенды, страву прыдумалі ў Мексіцы, у гарадку П’едрас-Неграс, штат Каўіла. Месца дзеі — невялікі рэстаран пад назвай «El Moderno», якім кіраваў кухмістр Ігнасіа «Нача» Аная («Нача» — скарочаная форма імя «Ігнасіа»). Неяк увечары ва ўстанову завіталі сталыя кліенткі — жонкі амерыканскіх вайскоўцаў — і папрасілі што-небудзь перакусіць, хаця кухня была ўжо зачынена. Знаходлівы Игнасіа змяшаў сыр з кавалачкамі тарцільі, дадаў туды халапенья, разагрэў і падаў на стол. «Як гэта называецца?», — спыталі дамы, маючы на ўвазе страву. «Нача», — адказаў кухмістр, маючы на ўвазе сябе.

Нягледзячы на прастату ў прыгатаванні (а можа, і дзякуючы ёй), закуска імкліва набыла папулярнасць. Калі людзі жадалі замовіць яе, яны проста казалі: «Начас, калі ласка».

Сёння на радзіме начас, у П’едрас-Неграс, штогод праходзіць міжнародны фестываль начас – тры дні ў сярэдзіне кастрычніка, з канцэртамі і іншымі культурнымі мерапрыемствамі. Ну і, безумоўна, з конкурсам на самы вялікі начас.

Дарэчы, найвялікшую порцыю начас прыгатавалі ў 2012 годзе ў кампаніі Centerplate у Канзаскім універсітэце ў Лоўрэнсе, штат Канзас. Яна важыла 2127 кг і складалася з 347 кг чыпсаў нача, 184 кг сальсы, 147 кг памідораў, 416 кг мяса і бабоў і больш як 1000 кг сыру.

Ну а ў ЗША Нацыянальны дзень начас адзначаюць 6 лістапада.

👨🏼‍🍳 👨🏼‍🍳 👨🏼‍🍳 👨🏼‍🍳 👨🏼‍🍳 👨🏼‍🍳 👨🏼‍🍳

• кукурузная тарцілья альбо гатовыя чыпсы начас

---

Каб зрабіць чыпсы начас самому, трэба проста абсмажыць кавалкі кукурузнай тарцільі.
Але значна прасцей купіць гатовыя:

Традыцыйны рэцэпт:

Прыгатаваць сырны соус для начас (Salsa de queso para nachos).

Чыпсы начас заліць сырным соусам і пасыпаць чырвоным перцам пажаданай вастрыні:

Можна дадаць кавалачкі халапенья альбо іншага перцу.

Начас З чылі кон карнэ:

Гэта бадай самы папулярны рэцэпт начас.

Прыгатаваць Чылі Кон Карнэ (Chili Con Carne).

На талерцы (падносе, сподку і г.д.) раскласці чыпсы, а зверху размясціць чылі кон карнэ:

Пасыпаць цёртым сырам:

Некалькі слаёў толькі вітаюцца:

Запекчы ў гарачай духоўцы альбо разагрэць у мікрахвалёўцы:

Bueno, buen apetito!

---

У ірландскіх пабах часам падаюць «ірландскія начас» – з начынкай, пакладзенай на запечаную бульбу ці нават на бульбу фры.

Ёсць нават варыянт так званых дэсертных начас. Хаця называць іх «начас» – няправільна. Гэта проста нешта салодкае накшталт джэму, шакаладу ці нават зефіру, выкладзенае на хрумсткую аснову.

Самыя распаўсюджаныя варыянты начынкі:

• фасоля
• нарэзанае і абсмажанае мяса, здробнены стэйк, часам бекон, кілбаса пепероні ці вяндліна
• соўс «Гуакамоле»
• соўс «Піка дэ гала»
• востры перац
• кінза
• зялёная цыбуля
• латук
• лайм
• аліўкі
• часнок
• смятана
• …

Самыя распаўсюджаныя сыры, якія выкарыстоўваюцца для начас:

• чэдар (англійскі сыр)
• каціха (мексіканскі сыр)
• ахака (мексіканскі сыр)
• мацарэла (італьянскі сыр)
• мантэрэй Джэк (каліфарнійскі сыр)
• пеперджэк (каліфарнійскі сыр)
• провель (папулярны ў Сэнт-Луісе)
• сырны тварог (кавалкі сыраваткі, папулярныя ў Канадзе)

Начынкі і сыры могуць падавацца ў выглядзе шведскага стала, каб кожны мог сабраць свой начас сам.