«Калалак» (Կոլոլակ) так і перакладаецца – «фрыкадэлька».

Акрамя супу, які звычайна называюць проста «калалак», ёсць яшчэ маса галоўных страваў з гэтай назвай, найбольш вядомыя з якіх – калалак шыракскі і калалак гехаркуні.
Можа, як-небудзь і да іх рукі дойдуць…

• мяса (бараніна ці ялавічына) – 500 г, плюс косці для булёну – 400 г, ці мяса на костках – 900 г
• цыбуля рэпкавая – 3 сярэдніх
• рыс – 2 ст. л. з горкай
• манная крупа ці дробны булгур – 2 ст. л. 
• яйкі – 2 шт.
• бульба – 4-5 сярэдніх ці каштаны – 10-15 шт.
• паста таматавая – 1 ст. л. без горкі
• зеляніна (зялёная цыбуля, пятрушка, эстрагон)
• соль, перац, спецыі (базілік, каляндра, чабер, размарын, кмен) 

---

☝️Для калалаку з баранінай найлепш пасуе задняя частка тушы.
Для ялавічнага – лапатка плюс косці на булён.

Аддзяліць мяса ад костак (калі робіцца з мяса на костках).

З касцей прыгатаваць булён, дадаўшы ў яго цыбулю, салеру і чорны перац:

Булён працадзіць.

Цыбулю дробна нашаткаваць і абсмажыць да залацістага:

Пятрушку і эстрагон здрабніць. Калі няма свежага эстрагону, цалкам падыдзе сухі. Не варта яго ігнараваць, ён надае вельмі важны прысмак:

Рыс адварыць да гатовасці, зеляніну дробна насекчы:

Начынка для фрыкадэлек:

Змяшаць рыс з паловай абсмажанай цыбулі і паловай зеляніны.
Пасаліць:

Старанна перамяшаць:

фрыкадэлькі:

Мяса прагнаць праз мясарубку спачатку адзін раз:

А потым другі раз:

Дадаць у фарш манную крупу і яйкі, соль, перац і спецыі:

Далей неабходна лірычнае адступленне.

Калалак бывае двух тыпаў: суфлепадобны і фаршападобны.

У суфлепадобным фарш спачатку доооўга адбіваюць малатком, дадаючы масла, малако і каньяк, а потым узбіваюць да той самай суфлепадобнай кансістэнцыі.
Звычайна такі калалак ўяўляе з сябе галоўную страву.

Для супавых фрыкадэлек робяць фаршападобны калалак. Фарш спачатку перамешваюць, а потым крыху адбіваюць малатком да больш-менш аднароднай кансістэнцыі. Але для спрашчэння задачы можна проста ўзбіць міксерам:

Зрабіць з фаршу аладку дыяметрам з далонь.
Пакласці ў цэнтр рысавую начынку:

Накрыць фаршам і зляпіць такім чынам фрыкадэльку памерам з буйное курынае яйка.
Ператварыць гэткім жа чынам увесь фарш у фрыкадэлькі-калалакі:

Паставіць фрыкадэлькі ў маразілку (ненадоўга), каб не развальваліся пры варцы.

Тым часам працэджаны булён давесці да кіпення.

Бульбу ачысціць і нарэзаць на кавалкі сярэдняга памеру:

Пакласці ў суп.

Да цыбулі, што засталася, дадаць таматавую пасту і злёгку пасераваць:

Пакласці ў суп, давесці да кіпення.

Акуратна апусціць у булён фрыкадэлькі.

Давесці яшчэ раз да кіпення, зменшыць агонь да сярэдняга і варыць 15-20 хв.

У самым канцы дадаць рэшткі пятрушкі і эстрагону.

Падаваць, шчодра пасыпаўшы зялёнай цыбуляй:

---

Калалак – суп рэгіянальны. Напрыклад, у сюнікскім калалаку для начынкі выкарыстоўваюць кізіл, у некаторых іншых рэгіёнах дадаюць нут. Часам разам з бульбай кладуць нарэзаную на колцы абсмажаную моркву.