У сваёй ідэі хасельбак (hasselbackspotatis) – гэта запечаная бульба, надрэзаная прыкладна на дзве траціны сваёй глыбіні на тонкія, веерападобныя лустачкі.

Паводле асноўнай версіі, бульбу хасельбак прыдумалі ў 1953 годзе ў Стакгольмскай рэстарацыі пад назвай «Хасельбакен» («Hasselbacken», альбо «арэхавы схіл»). Вось што напісана на афіцыйным сайце гэтай установы:

• У перыяд з 1940-х па 1960-я гады ў Hasselbacken знаходзілася кулінарная школа, дзе былі створаныя сусветна вядомыя бульбяныя дзелькі Hasselbacken — фірмовая страва, якую вы заўсёды можаце замовіць у нас і якая з’яўляецца сімвалам адданасці рэстарана традыцыям і інавацыям.

Хасельбак прыдумаў, як сцвярджаюць кампетэнтныя крыніцы, Лейф Элісан з Вермланда, кухар-стажор гэтай рэстарацыі. Паводле чутак, у 1955 годзе лаўры аўтара прысабечыў дырэктар стакгольмскай кулінарнай школы, і імя Лейфа Элісана на сайце рэстарацыі нават і няма.😒

Аднак ёсць пара нестыковачак…

Напрыклад, у «Кулінарнай кнізе часопіса Ідун» («Iduns kokbok») Элізабет Эстман, апублікаванай у 1911 годзе, ёсць рэцэпт запечанай бульбы, якая «наразаецца на лустачкі таўшчынёй 1/2 см, якія складваюцца разам так, каб бульба трымала форму».

Падобны рэцэпт запечанай бульбы быў таксама знойдзены ў «Кулінарнай кнізе прынцэсы» (Prinsessornas kokbok) Джэні Акерстром 1929 года.

А ў 1934 годзе «Сённяшнія навіны» («Dagens Nyheter», найбуйнейшая ранішняя газета Швецыі) апублікавала рэцэпт «цэлай ачышчанай і надрэзанай, пасыпанай сырам, засмажанай у духоўцы бульбы».

Карацей, не ведаю, хто там у Швецыі гэта прыдумаў, але прыдумаў на пяць з плюсам.☺️

---

• бульба – 1 шт.
• масла
• соль, перац

---

Самы просты спосаб прыгатавання бульбы хасельбак – выкарыстоўваць звычайныя палачкі для азіяцкай ежы, паклаўшы іх шчыльна паабапал бульбіны.
Далей – робім выгляд, што наразаем бульбіну на тонкія лустачкі. Палачкі застопараць нож, каб бульбіна не была поўнасцю разрэзаная.

Мне было вельмі шкада псаваць нажом мае любімыя палачкі, а аднаразовых пад рукой не было… Нарэшце я выкарыстаў звычайныя шпажкі… Але з такімі палачкамі трэба быць асцярожным: ёсць шанец разрэзаць бульбіну поўнасцю (чаго рабіць не варта, калі вы не прыхільнік варыянту Элізабет Эстман😊).

У выніку павінна атрымацца тонка надрэзаная гармонікам/веерам бульбіна:

Каб атрымаць залацісты карамелізаваны хасельбак, яго трэба запякаць са сметанковым маслам:

Крыху сметанковага масла распусціць на патэльні:

Пакласці надрэзанную бульбіну ў форму для запякання:

Багата змазаць растопленым маслам, злёгку пасыпаць соллю і перцам.

Разагрэць духоўку да 225°C .

Запякаць хвілін 15. Праверыць: калі ёсць адчуванне, што страва можа падгарэць, – накрыць фольгай і злёгку прыціснуць яе да бульбы, каб не перасушыць верхнюю частку.

Запякаць яшчэ хвілін 15 (з фольгай ці без – залежыць ад духоўкі):

Самы просты варыянт падачы – пасыпаўшы зелянінай:

---

І тут ужо можна ўключаць фантазію🌈. Паміж бульбяных дзелек можна запіхаць, напрыклад:

• бекон
• сыр
• папрыку
• цыбулю
• ….

---

☝️А вось яшчэ ідэя: раней ва ўжытку былі драўляныя лыжкі на любы выпадак. Бярэш такую лыжку патрэбнага памеру, кладзеш на яе бульбіну, пачынаеш надразаць – і ніякіх палачак не трэба!