Лобія (па-грузінску ლობიო) перакладаецца як «фасоля».
Так можа называцца любая страва, у базавы склад якой уваходзіць любая фасоля – і струковая, і ў зярнятах. Можа быць як з мясам, так і без.
Першапачаткова лобія, дарэчы, рабілі не з фасолі, а з пладоў даліхаса — гіяцынтавага боба. Фасолі тады ў Грузіі яшчэ не было, яна там з’явілася толькі ў канцы XVII стагоддзя.
У варыянце ніжэй – лобія з зялёнай струковай фасолі, альбо «мцванэ лобія» (მწვანე ლობიო), з мясам.
- фасоля струковая – 300 г
- мяса (бараніна альбо ялавічына) – 300 г. У прынцыпе, можна рабіць і з курыцы, калі не вельмі строга трымацца традыцый.😉
- цыбуля рэпкавая – 1-2 сярэдніх
- часнок – 3-6 зубцоў
- зеляніна (кінза, мята, пятрушка – абавязкова, плюс чабор, эстрагон, базілік) – па невялікім пучку
- соль, перац, спецыі (хмелі-сунэлі, уцха-сунэлі (ён жа блакітны пажытнік), плюс можна ўзмацніць каляндру, папрыку, размарын ці чабер, якія ўваходзяць у склад хмелі-сунэлі).
Мяса нарэзаць на кавалкі памерам з грэцкі арэх:
Пасыпаць спецыямі і перцам:
Абсмажыць у алеі да залацістай скарынкі:
Дадаць дробна нашаткаваную цыбулю і абсмажыць разам да залацістага:
Уліць крыху булёну, дадаць палову часнаку (душанага), закрыць накрыўкай і тушыць на невялікім агні амаль да гатовасці:
Тым часам фасолю нарэзаць на невялікія кавалкі і падрыхтаваць зеляніну:
Дадаць да мяса нарэзаныя струкі фасолі, пасаліць.
Дадаць, калі трэба, булён – каб фасоля была крыху накрытая вадкасцю. Тушыць пад закрытай накрыўкай да гатовасці мяса і фасолі.
☝️Свежая фасоля будзе гатовая прыкладна праз 20-25 хвілін, а замарожаная – значна хутчэй, праз хвілін 5-10.
Кантраляваць ваду, бо можа падгарэць.
Пакуль тушыцца мяса, насекчы зеляніну (але не занадта дробна).
Калі мяса і фасоля гатовыя, заправіць насечанай зелянінай, рэштай душанага часнаку, чорным перцам.
Спраўдзіць на соль, спецыі.
Зняць з пліты, даць настаяцца:
☝️ Важна дамагчыся правільнай колькасці соусу – яго павінна быць не зашмат, але ён мае быць канцэнтраваным. Прасцей кажучы, страва павінна быць вельмі сакавітай.
My Pocket CookBook 