Пераканаўчы украінскі адказ рускаму расольніку.

Гэты рэцэпт я выпадкова напаткаў у кнізе «Савецкая нацыянальная і замежная кухня» аўтарства А. Ціцюнніка. Іншых згадак пра гэткі суп я нідзе і ніколі не сустракаў.
Магчыма, першапачаткова, акрамя салёных агуркоў, у яго дадавалі агурковую траву – агурочнік – замест шпінату/салаты.
Калі вы раптам штосьці чулі пра такую страву ці каштавалі яе дагэтуль, напішыце ў каментах, плз…❤️

• ялавічныя косткі для булёну – 400 г
• сэрца (таксама ялавічнае) – 350-400 г
• цыбуля рэпкавая – 1 вялікая цыбуліна альбо 2 невялічкіх
• морква – 2 сярэдняга памеру
• корань пятрушкі ці салеры – прыкладна палова ад колькасці морквы
• бульба – 3-4 сярэдняга памеру
• агуркі салёныя – 3-4 невялікіх
• шпінат ці зялёная салата – вялікі пучок 
• мука пшанічная – 1 ст. л.
• смятана для заправы
• зеляніна (пятрушкa, кроп, зялёная цыбуля)
• соль, перац, спецыі (перац-гарошак, англійскі, лаўровы ліст – для булёна, а чабор і базілік – для супу)

---

З ялавічных касцей зварыць булён.
💡Чым больш у ім разнастайных «булённых» складнікаў і чым ён наварысцей, тым лепш.
Гатовы булён працадзіць:

Ялавічнае сэрца разрэзаць уздоўж, прамыць, выдаліць рэшткі сасудаў і залішні тлушч:

Нарэзаць на невялікія кавалачкі, пакласці ў несалёную ваду, калі яна ўжо закіпіць, і адварыць да гатовасці. Варыць не больш за паўтары гадзіны, каб мяса не стала залішне цвёрдым.

Тым часам падрыхтаваць гародніну:

Цыбулю парэзаць дробна, моркву – на колцы.
Корань пятрушкі ці салеры нашаткаваць саломкай:

Лук пасераваць з пятрушкай ці салерай да залацістага колеру:

Дадаць моркву і абсмажваць, пакуль яна не зробіцца мяккай:

Насыпаць муку і абсмажваць яшчэ пару хвілін. Даліць крыху булёну і давесці да кіпення:

Зваранае ялавічнае сэрца прамыць і нарэзаць на маленькія кубікі.
Бульбу пачысціць і нарэзаць на кубікі сярэдняга памеру:

Давесці булён да кіпення.
Пакласці ў яго бульбу, пасераваную гародніну і нарэзанае на кавалкі сэрца. Варыць, пакуль бульба не будзе амаль гатовая.

Салату ці шпінат нашаткаваць, але не занадта дробна.

Салёныя агуркі дробна нарэзаць і прыпусціць, дадаўшы крыху булёну.
💡У суп пойдуць толькі агуркі, вадкасць трэба зліць. Калі салёныя агуркі не прыпускаць, суп будзе закіслым і мець непрыемны «бочкавы» пах.

Калі ў вас марынаваныя агуркі, іх прыпускаць не варта, проста дробна парэзаць:

Дадаць прыпушчаныя (ці не) агуркі, нарэзанае лісце салаты/шпінату, соль (пэўную колькасць солі выпусцяць агуркі, таму тут трэба ўсё каштаваць), і спецыі.

💡Агуркамі рэгулюецца неабходная ў супе кіслінка. Кожны сам вызначае, калі спыніцца.

Давесці да кіпення і выключыць.

Праверыць на соль і кіслату. Калі хочацца дасаліць, можна дадаць больш агуркоў ці пракіпячонага агурковага расолу.

Даць настаяцца.

Падаваць са смятанай, пасыпаўшы дробна насечанай зелянінай і зялёнай цыбуляй:

---

💡Замест сэрца можна ўзяць язык (як ялавічны, так і свіны):