Па-венгерску гэта называецца «Csirkeaprólék raguleves».

• птушыныя трыбухі – ад 700 г да 1 кг, у залежнасці ад пажаданай гушчыні супу. Палова – сэрцы і страўнікі (альбо толькі сэрцы), палова – пячонка
• цыбуля рэпкавая – 2 сярэдніх
• морква – 2 сярэдніх 
• корань пятрушкі альбо салеры – палова ад колькасці морквы 
• гарошак зялёны – 250 г 
• шампіньёны – 200 – 250 г 
• мука, малако, масла (для соусу) 
• часнок – 2-5 зубчыкаў
• зеляніна (пятрушка, эстрагон – абавязкова, можна выкарыстоўваць сухі) 
• папрыка – 2 ст. л. без горкі
• соль, перац, спецыі (маяран, чабор, кмен) 

---

Цыбулю нарэзаць на чвэрцьколцы, моркву – на колцы, корань пятрушкі/салеры – саломкай:

Падрыхтаваць трыбухі:

• сэрцы: зняць тлушч і добра прамыць
• страўнікі: праверыць якасць ачысткі і парэзаць на кубікі сярэднага памеру
• пячонка: на дробныя кавалкі

Нарэзаную цыбулю пасераваць да залацістага. У арыгінале – на свіным тлушчы, у некаторых рэгіёнах – на распаленым вэнджаным сале, для ЗЛЖ-версіі – на раслінным алеі:

Пакласці моркву, пятрушку/салеру, душаны часнок і пасераваць да паўгатовасці:

Дадаць папрыку і яшчэ злёгку абсмажыць (нядоўга, папрыка не павінна падгарэць):

Уліць 1,5 літры вады, пакласці сэрцы і страўнікі і варыць на слабым агні амаль да гатовасці.

Тым часам нарэзаць шампіньёны на тонкія пласцінкі:

Калі сэрцы і страўнікі амаль гатовыя, дадаць нарэзаную пячонку, шампіньёны і зялёны гарошак (свежы ці марожаны, але ніяк не кансерваваны).

Праверыць на соль, дадаць спецыі.

Давесці да кіпення і варыць да гатовасці – хвілін 10.

Тым часам прыгатаваць соус Бешамель.

Заправіць гатовы суп белым соусам ці (у скрайнім выпадку, калі ўжо зусім лянота) проста вяршкамі.

Перад падачай пасыпаць зелянінай:

---

Суп павінен атрымацца даволі густы (гэта рагу ўсё ж).

Калі ёсць, напрыклад, толькі пячонка – не праблема, можна зрабіць і на звычайным курыным булёне. Пару крыльцаў дадаць – і гатова. Такі варыянт часта сустракаецца на венгерскіх сайтах.

Часам у канцы дадаюць тархоню – хатнюю локшыну ў выглядзе зярнятак.
Можна замяніць на звычайную локшыну ці вермішэль.

Падчас абсмажвання часта дадаюць нарэзаны на невялікія квадраты зялёны перац. Можна выкарыстоўваць звычайны сухі гарох, але тады варта яго загадзя замачыць.
Закладваць разам з сэрцамі і страўнікамі.