Францыя: Качыная ножка конфі (Confit de canard)

Захоўванне мяса в расплаўленым тлушчы – адзін з самых старажытных спосабаў кансервацыі.
Прыгатаванае такім спосабам мяса можа захоўвацца да года.

Назва пайшла ад французскага слова «confire» («зацукроўваць», «марынаваць»).
Ну а слова «confire» – ад лацінскага «conficere» («рабіць», «гатаваць»). Першапачаткова «confit» азначала «зацукраваная садавіна»: адсюль і пайшлі словы «канфіцюр» і «цукерка».

Французы лічаць сапраўдным конфі толькі стравы з качкі, у скрайнім выпадку – з гуся. Усе астатнія гатункі мяса ў качыным тлушчы называюцца інакш: «en confit». Напрыклад, курыца ў качыным тлушчы будзе не «confit de poule» (курыца конфі), а «poulet en confit» – (курыца Ў конфі).

  • качыныя ножкі – 3 шт.
  • качыны тлушч – 500-700 мл
  • часнок – 3-4 зубчыкі
  • чабор – 3 галінкі
  • размары­н – 3 галінкі
  • дадатковыя спецыі – ядловец, лаўровы ліст (на смак)
  • соль, перац

Скурку на качыных ножках трэба надрэзаць ці пракалоць відэльцам, каб выходзіў тлушч:

Нацерці соллю і перцам, выціснутым часнаком, лаўровым лістом, чаборам і размарынам. Часам дадаюць цыбулю і ядловец.

Скласці ножкі скуркай долу ў тэрмаўстойлівы посуд:

Шчыльна закрыць (можна харчовай плёнкай) і марынаваць у закрытым посудзе ў лядоўні суткі ці двое (часам нават трое).

Перагарнуць ножкі скуркай дагары.
Калі падабаецца часнаковы смак – раскласці нарэзаны на пласцінкі часнок:

Заліць ножкі распаленым качыным тлушчам:

Адправіць у разагрэтую да 130-140° С духоўку і трымаць там каля 2-3 гадзін.
Мяса ў выніку мае лёгка аддзяляцца ад костак.

Акурат на гэтым этапе можна перагрузіць ножкі ў керамічны альбо шкляны посуд так, каб тлушч цалкам пакрываў мяса, і захоўваць у прахалодным месцы 2-3 месяцы, а ў лядоўні – нават больш.

Перад падачай разагрэць на патэльні альбо ў духоўцы да румянай скарынкі:

Ідэальна з садавінавым соусам і запечаным часнаком.

☝️Не варта апасацца вялізнай колькасці тлушчу – мяса яго не ўбірае, і на вашых баках ён на адкладзецца.😉

Найлепшыя часткі качкі для прыгатавання конфі – ножкі, паляндвіца і качыныя страўнікі.

Для ідэальнага смаку і доўгага захоўвання варта браць менавіта качыны тлушч: ён добра застывае пры пакаёвай тэмпературы. Але, калі вы плануеце з’есці ўсё мяса адразу і не захоўваць яго, то можна выкарыстоўваць тлушч любой птушкі і нават раслінны алей.