Чахахбілі перакладаецца як «рагу з фазана». Па-грузінску хахобі – фазан.

Упершыню рэцэпт чахахбілі быў апублікаваны ў кулінарнай кнізе вядомай грузінскай пісьменніцы, паэтэсы і аўтаркі першага фемінісцкага маніфесту Барбары Джарджадзэ «Грузінская кухня і парады па вядзенні хатняй гаспадаркі», што выйшла ў далёкім 1874 годзе.

У рэцэпце Барбары фазана першапачаткова абсмажвалі на ражне. Асобна ў сметанковым масле абсмажвалі цыбулю, дадавалі фазана, улівалі ваду і тушылі да гатовасці, а ў самым канцы запраўлялі барбарысам і воцатам альбо гранатавым сокам. Памідоры ў рэцэпце чахахбілі з’явіліся ўжо ў XX стагоддзі.

Такім чынам, першапачаткова чахахбілі гатавалі з фазана.
Цяпер – з любой хатняй птушкі.

Робім на прыкладзе курыцы, бо папугая шкада.😉

• курыца – 1 шт. каля 1, 2 кг (можна браць паляндвіцу, купмячкі, сцёгны – што падабаецца).
• цыбуля рэпкавая – 4-5 сярэдніх
• тамат-паста – 1-2 ст. л.
• памідоры – 8 сярэдніх, альбо таматы ва ўласным соку. Можна камбінаваць.
• часнок – галоўка (можна і больш, калі падабаецца яркі часночны прысмак)
• лімонны сок альбо воцат вінны – на смак, 1-2 ст. л.
• белае віно – каля 150 г
• масла сметанковае
• салодкі перац (па жаданні)
• зеляніна (кінза, базілік, пятруш­ка – пажадана, плюс мята, чабор, эстрагон, кроп, …)
• соль, спецыі (перац, папрыка)

---

Курыцу парэзаць на кавалкі:

Пасаліць, папярчыць і абсмажыць у зусім невялікай колькасці масла.
У класічных рэцэптах раяць абсмажваць без масла 15 хвілін на вельмі гарачай патэльні, увесь час перагортваючы. Найвышэйшы пілатаж☺️

Перакласці ў большы таўстасценны рондаль.

Смак чахахбілі наўпрост залежыць ад смаку памідораў – яны маюць быць спелыя і мясістыя. Калі такіх няма, больш надзейна ўзяць таматы ва ўласным соку.
Можна палову натуральных, палову – кансерваваных.
Асноўнае правіла: гародніны павінна быць не менш за мяса.

Памідоры аблупіць бязлітасна і здрабніць. Раней наогул душылі рукамі.

Цыбулю нарэзаць на паўколцы:

Абсмажыць цыбулю ў сметанковым масле да празрыстасці:

Дадаць таматную пасту і чайную лыжку цукру, абсмажыць яшчэ пару хвілін:

Паводле некаторых рэцэптаў, цыбулю можна не абсмажваць, а закладваць асобна, з таматнай пастай. Смак будзе больш свежы, але знікне прысмак смажанай цыбулі.

Таматную пасту таксама нібыта можна не дадаваць – маўляў, так губляецца натуральнасць смаку. Я скажу так: калі памідоры мясістыя і спелыя – можна і без пасты. Калі не – варта дадаць:

Пакласці ў цыбулю мяса і злёгку пратушыць (хвіліны 3).

Пакласці дробна насечаныя памідоры (альбо душаныя таматы ва ўласным соку).
Уліць невялікую колькасць белага віна. Шмат вадкасці не трэба, бо памідоры выпусцяць даволі шмат соку. ☝️Віно ні ў якім выпадку не чырвонае, інакш атрымаецца ўжо не чахахбілі, а нейкае гурулі:

Давесці да кіпення і тушыць пры закрытай накрыўцы хвілін 15-20.

Тым часам падрыхтаваць зеляніну, якой павінна быць шмат:

Зеляніну насекчы, але не вельмі дробна:

Праз 20 хвілін, калі трэба, дадаць вінны воцат альбо лімонны сок. Тут трэба каштаваць: павінна адчувацца лёгкая кіслінка, а некаторыя памідоры могуць быць і так дастаткова кіслыя.
Дадаць спецыі і крыху солі.
Калі трэба, даліць белага віна. Вадкасць павінна цалкам пакрываць курыцу.

Тушыць да поўнай гатовасці (хвілін 10-20, залежыць ад колькасці).
Пакласці соль, тоўчаны часнок (не душаны) і насечаную зеляніну. Класічнае чахахбілі – пікантнае, нават вострае.

Даць настаяцца хвілін 10.

На гарнір у класічным варыянце – аладка пуры альбо лаваш.
Але калі хочацца бульбы альбо макаронаў – таксама нармальна.☺️

---

У некаторых рэгіёнах робяць з баранінай, радзей – з ялавічынай. Ёсць нават варыянты з курынай трыбухой.

Адметнасць чахахбілі – амаль поўная адсутнасць масла.

Часам разам з памідорамі дадаюць абсмажаны салодкі перац. Гэта не аўтэнтычна, але смачна. У некоторых рэгіёнах разам з цыбуляй абсмажваюць моркву, а напрыканцы дадаюць ткемалі.