Тройка найпапулярнейшых чэшскіх супоў, якія можна сустрэць практычна ў кожнай чэшскай забягалаўцы, – гэта часнэчка (česnečka), цыбулачка (cibulačka) і гуляшова палеўка (gulašova polevka).

На пытанне, калі ў Чэхіі з’явілася часнэчка, чэхі адказваюць: «Калі піва з’явілася, тады і часнэчка. На выпадак пахмелля…» Робім высновы!😉

Часнэчка:

• булён – 1 л (лепш за ўсё ялавічны, але можна і курыны, і гароднінны)
• часнок – 2 галоўкі мінімум (можна больш, залежыць ад любові да часнаку)
• бульба – 3-4 сярэдняга памеру
• сметанковае масла – 1 ст. л.
• яйкі – 2 шт. (часам бяруць толькі жаўткі, тады 3 шт.)
• зеляніна (пятрушка, кроп, цыбуля-парэй ці зялёная цыбуля) – для падачы
• соль, перац, спецыі (кмен, чабор, маяран)

Грэнкі:

• кнэдлік (можна французская булачка ці багет) альбо сухарыкі
• жоўты цвёрды сыр (апцыянальна)

---

Прыгатаваць булён з дадаткам цыбулі, морквы, салеры, лаўровага ліста і чорнага перцу:

Калі булён мясны – чым ён будзе мацнейшы, тым лепш.
Гатовы булён працадзіць. Бульбу нарэзаць на невялікія кубікі:

Булён давесці да кіпення, пакласці туды бульбу і варыць да гатовасці.

За 10 хвілін да канца варкі дадаць спецыі: перац, чабор і маяран.

Нічога страшнага, калі бульба моцна разварыцца. Часам гэта нават робяць спецыяльна, а потым пюруюць бульбу блендэрам, каб загусціць суп.

Пакуль бульба варыцца, палову часнаку нарэзаць на кружочкі.
Другую палову дробна нашаткаваць альбо выціснуць пры дапамозе часночнага прэсу:

Першую частку часнаку (кружочкі) пакласці ў разагрэтую з вяршковым маслам патэльню, дадаць кмен і абсмажваць 1-2 хвіліны:

Дадаць другую частку (душаную ці дробна нашаткаваную) і абсмажыць яшчэ хвіліну. Важна не перасмажыць, інакш часнок будзе непрыемна гаркавіць:

Пакласці часнок у рондаль з булёнам і гатовай бульбай, выключыць агонь.
Праверыць на соль.

Падрыхтаваць яйкі. Часам выкарыстоўваюць толькі жаўткі, і тады суп атрымлівае больш вяршковы смак і ярчэйшы колер. Але традыцыйна выкарыстоўвалі і жаўток, і бялок:

Старанна ўзбіць яйкі (ці жаўткі):

Даць супу астыць градусаў да 80 і ўліць яйка ў суп тонкім струменьчыкам, актыўна памешваючы.
Пасля лііравання кіпяціць суп ужо нельга, бо згорнуцца яйкі.

Пакуль суп астывае, падрыхтаваць грэнкі (калі вы не выкарыстоўваеце гатовыя крутоны).
Кнэдлік/багет/булачку разрэзаць на палавінкі/лустачкі:

Пасыпаць нацёртым на дробнай тарцы сырам (апцыянальна):

Запякаць у духоўцы да залацістай скарынкі:

Падаваць часнэчку, пасыпаўшы зелянінай, з запечанымі грэнкамі:

---

Часам бульбу папярэдне абсмажваюць.

У розных рэгіёнах Чэхіі ў часнэчку дадаюць:

• абсмажаны бекон
• абсмажаную цыбулю
• абсмажаныя грыбы
• палавінкі перапёлчыных яек
• масліны

Суп робяць рознай кансістэнцыі. Напрыклад, дадаўшы крыху больш бульбы ці лыжку мукі, можна атрымаць больш густую часнэчку.

Ёсць варыянт супу-пюрэ: перад дадаваннем яйка ўліць 100 мл вяршкоў і пюраваць паглыбным блендэрам.

Часам часнок не абсмажваюць, а запякаюць у духоўцы і толькі пасля здрабняюць.

Часнэчка можа падавацца ў хлебе.