«Бехі» ў перакладзе з узбекскага – айва.
«Жаркоп», адпаведна, – смажаніна.

Звычайна гатуюць у казане, але цалкам можна прыгатаваць і ў воку, і ў качачніцы.

• бараніна – 500 г
• айва – 700-800 г
• цыбуля рэпкавая – 3 сярэдніх
• кінза – пучок
• базілік – паўпучка
• соль, спецыі (зіра, аніс, каляндра, чорны перац)

---

Бараніну звычайна выкарыстоўваюць тлустую, нарэзаную на кавалкі сярэдняга памеру, як для плову:

Цыбулю нарэзаць на паўколцы.
Зеляніну дробна насекчы.
З айвы выдаліць сярэдзіну і нарэзаць на дзелькі – на 12-16 частак:

Пакласці мяса ў казан, вок ці качачніцу і абсмажыць на моцным агні да залацістай скарынкі:

Дадаць да мяса цыбулю:

Памешваючы, абсмажваць да залацістага.
У канцы дадаць соль і спецыі, плюс палову кінзы і базіліку:

Раскласці на мясе дзелькі айвы:

Уліць крыху вады. Шмат не трэба, бо айва выпусціць сок.
Зменшыць агонь да маленькага, закрыць накрыўкай і «таміць» да гатовасці: мяса і айва маюць памякчэць. Гэта займае ад 1 да 2 гадзін, у залежнасці ад гатунку айвы, якасці мяса і памеру кавалкаў.

☝️Час ад часу трэба кантраляваць ваду. Калі выпарыцца ўся вадкасць, смажаніна будзе безнадзейна сапсаваная, і нават бездаглядныя беларускія коцікі наўрадці паквапяцца на падгарэлую бараніну з саладкаватым прысмакам айвы…

Калі мяса і айва памякчэюць, яшчэ раз праверыць на соль, спецыі, пакласці большую частку зеляніны, якая засталася.

Зняць з агню:

Пры падачы пасыпаць кінзой і базілікам:

---

У некаторых рэцэптах дадаюць бульбу. Але гэта яўна няправільна, бо ва Узбекістане гістарычна не выкарыстоўвалі бульбы: яна вельмі позна туды дабралася.

Калі хочацца чагосьці дадаць, то лепш рэпы. Рэпа, уласна, родам менавіта з Заходняй Азіі.