У Францыі іх называюць «Aubergines à la Bonifacienne» – «баклажаны па-баніфасьенску», ну а турысты, не затлумляючы сабе галавы, часта проста кажуць «баклажаны па-карсіканску».

Фірмовая страва горада Баніфача, размешчанага на паўднёвым ускрайку выспы Корсіка ў Францыі.

Традыцыйная страва на свяце Троіцкага кляштару Баніфача (Bonifacio l’ermitage de la Trinité), які ладзіцца штогод 8 верасня.

• баклажан – 1 сярэдні
• белы чэрствы хлеб – 1-2 лустачкі
• малако – 100-150 мл
• яйкі – 1 шт.
• сыр: ідэальна – сумесь авечых карсіканскіх сыроў, тыпу tomme corse альбо brocciu passu, прычым рознай вытрымкі – свежы, сярэдняй вытрымкі і вытрыманы. Карсіканскія сыры знайсці складана, таму заменім іх на сярэдняй вытрымкі Pecorino Romano і цвёрды Parmigiano Reggiano – 1 шклянка
• часнок – 1 зубчык
• цыбуля шалот – 1 сярэдняя (па жаданні)
• базілік – невялікі пучок
• соль, перац, спецыі (травы правансу)

---

Ой, забыўся на Parmigiano! Куды ж без яго😉

Замачыць белы чэрствы хлеб у малацэ хвілін на 10:

Сыр нацерці на дробнай тарцы – можна ў блендары-здрабняльніку.
Цыбулю нарэзаць як мага драбней.
Базілік дробна насекчы:

У ваду, што кіпіць, пакласці цэлыя баклажаны з хвосцікамі і варыць хвілін 15 пад накрыўкай – залежыць ад памеру. Зліць ваду і даць астыць.

Разрэзаць баклажаны ўздоўж напалову і лыжкай акуратна дастаць мякаць, не парваўшы скуркі.

Нарэзаць мякаць баклажана на невялікія кавалачкі:

Падрыхтаваць замочаны хлеб – зліць малако і старанна размяць.

Спалучыць з баклажанамі:

Дадаць яйка, цыбулю, душаны часнок, сыр і базілік.
Дадаць на смак соль, перац і травы правансу:

Старанна вымяшаць:

Запоўніць кожную скурку баклажанаў начынкай (павінна быць шчыльна ўтрамбаваная).

Добра разагрэць аліўкавы алей.
Акуратна пакласці баклажаны начынкай долу на патэльню і абсмажваць хвілін 8-10 – начынка павінна добра схапіцца.

Асцярожна перагарнуць і абсмажваць яшчэ хвілін 5-7 – пакуль яны не падрумяняцца:

Часта падаюць з таматным соусам – пратушанымі аблупленымі памідорамі з соллю, перцам і травамі правансу.

Але часам ядуць і астуджанымі.

---

Ёсць яшчэ адзін варыянт прыгатавання: у форму для запякання выліваюць таматны соус, і проста ў соўс укладваюць баклажаны – начынкай дагары.

Запякаюць у духоўцы пры 180°C да з’яўлення румянай скарынкі.